जातां पंढरीसी सुख वाटे जीवा

जातां पंढरीसी सुख वाटे जीवा |

 आनंदें केशवा भेटतांचि || १ ||

या सुखाची उपमा नाहीं त्रिभुवनीं|  

पाहिली शोधोनी अवघीं तीर्थे || २ ||

ऐसा नामघोष ऐसे पताकांचे भार |

 ऐसे वैष्णव डिंगर दावा कोठें || ३ ||

ऐसी चंद्रभागा ऐसा पुंडलीक  |

ऐसा वेणुनादीं काला दावा || ४ ||

ऐसा विटेवरी उभा कटेवरी कर |

 ऐसें पाहतां निर्धार नाहीं कोठें || ५ ||

सेना म्हणे खूण सांगितली संतीं |

 यापरती विश्रांती न मिळे जीवा || ६ ||